Markus 6:1-13

Preek vir Sondag 8 Julie:




Gebed voor diens:

“Here, my beker is leeg

en ek verlang dat U my weer sal vul.

Ja, Here, kom vul my!

My liefde is maar lou –

kom, Here, en maak my weer warm, vurig . . .

dat my liefde sal uitstraal na hulle naby my.

My geloof is nie sterk nie en dit wankel tog so maklik –

ek twyfel soms en ander kere sukkel ek om te vertrou.

O Here, help my. Sterk my geloof en vertroue.

Ek is arm en U is ryk –

en U het juis gekom om vir armes u genade uit te deel.

Ek is ’n sondaar, U is regverdig

en daarom bly ek aan u sy.

Ek het niks om U aan te bied nie.

Ek kan alleen maar van U ontvang.”



Daar word vertel van die koning wie se seun baie ongelukkig was... Hulle het alles geprobeer om hom gelukkig te maak, maar niks wou regtig werk nie... Op ’n dag kom daar toe ’n wyse man wat die volgende raad aan die koning gee... Die prins moes deur die land gaan en iemand soek wat waarlik gelukkig is. Dan moes hy die persoon se hemp aantrek, en dit sou hom waarlik gelukkig maak!

Die prins het toe op reis deur die land gegaan, maar niemand gevind wat werklik gelukkig is nie. Hy het toe maar op sy reis teruggedraai huis toe... Oppad huistoe op sy perd hoor hy eendag hoe iemand lustig agter ’n kraalmuur sing... Onmiddelik het hy geweet! Hierdie persoon se hemp moet hy kry!

Hallo daar! Het die prins geroep... Skielik sien hy ’n kop wat oor die muur na hom loer... “Hallo, hoe gaan dit?”, vra die vriendelike man vir die prins. “Nee goed, maar waarom sing jy so?” wou die prins weet. “Omdat ek lief is daarvoor om te sing. Eintlik is ek lief vir die lewe! Ek is so gelukkig. Die lewe is een groot lied! Antwoord die man met ’n breë glimlag.

Opgewonde vra die prins hom toe: “Ek sal graag wil hê dat by my in die paleis moet kom woon...”. Die prins het geweet... sy soektog was verby! “Dankie vir die aanbod,” het die man vriendelik geantwoord, “maar hier wil ek bly. Ek sal niks in die wêreld, selfs nie eers die paleis... ruil vir die wonderlike lewe wat ek nou het nie...”

Dit was net weer ’n bevestiging vir die prins... Hierdie man se hemp moet ek kry. Hy spring toe oor die kraalmuur, net om te sien dat die man nie ’n hemp aanhet nie! En toe hy hom daaroor vra, en toe hy hom daaroor vra, sê die man toe aan hom dat hy nie eers ’n hemp besit nie (Van Rensburg, 2000:68-69)!

Ek weet dat elkeen wat vanoggend hier sit, graag gelukkig wil wees... Op die ou end wil elkeen kan sorgeloos kan sing... want die lewe moet ’n lied wees! Maar geluk is nie daar waar ons dikwels daarvoor soek nie...

Neem nou maar die sanger en harpspeler Dawid. Hy het die reus Goliat verslaan, en die mag van die Filistyne vir eens en vir altyd geknak... Dawid is die koning wat sy tienduisende verslaan het. Hy het die ryk van Israel vir eens en vir altyd in Jerusalem gevestig.

Maar al was Dawid’n groot koning, al het hy graag gesing en musiek gemaak, en baie Psalms geskryf, was sy lewe niks maklik nie... Saul het hom selfs onder beheer van ’n bose gees met ’n spies gegooi terwyl hy besig was om op die harp te speel... Sy eie vrou Migal het hom verag. Hy is deur Saul vervolg, moes ’n kind aan die dood afstaan, en het sy boesemvriend Jonathan in ’n geveg verloor. Hy moes uit Jerusalem vlug omdat sy eie seun ’n komplot teen hom gesmee het...

Ja, die suksesvolste koning in Israel se persoonlike lewe was gekenmerk deur moeilike verhoudings. In sy eie tyd is hy nooit regtig raakgesien of waardeer vir wie hy werklik is, en vir dit wat hy vir die Here gedoen het nie... Nee, die mense om hom het dikwels hulle geluk daarin probeer vind om Dawid te verkleineer en te vertrap...

As ’n mens na die verhaal in Markus 6:1-13 kyk, dan is dit in Jesus se geval nie veel anders nie... Jesus se lewe was mooi van ver af... Op die oog af moes dit ongelooflik gewees het om soveel wonders te kon doen. Om siekes te genees. Om ’n groot skare volgelinge te hê. En tog was dit alles behalwe maanskyn en rose... Jesus se verhouding met die mense naaste aan hom was altyd baie broos.

Julle sal onthou hoe Jesus se ma en pa na hom kom soek het in die tempel toe hy 12 jaar oud was, en hoe hulle hom verwyt het oor hy met die skrifgeleerdes en die rabbis daar gesels en geredeneer het. Op ’n ander geleentheid hoor ons hoe die broers en moeder van Jesus na hom soek, terwyl hy aan almal sê: “Julle is my moeder en my broers.”

Hier in Markus 6 vind ons die ironiese verhaal van Jesus wat in sy eie omgewing, in sy eie tuisdorp nie veel wonders kon doen nie... Op die oog af sou ’n mens kon sê: “Jesus het in Nasaret misluk...” Die mense het hom erken as die seun van die timmerman Josef... Die dorpie Nasaret het uit ‘n 120 tot ‘n 160 inwoners bestaan, en mense het nie gedink dat daar uit hierdie dorpie iets goeds kon kom nie. Jesus kon daar nie veel wonders doen nie...

Ek het altyd hierdie gedeelte gelees met die gedagte in my agterkop dat Jesus nie mense kon gesond maak nie, omdat die persone wat na Jesus toe gekom het se geloof nie groot genoeg was nie. Maar dit is verseker nie die geval nie. Nee liewe vriende, mense het net nie in daardie gebied mense na Jesus toe gebring nie!

Hulle het byvoorbaat gedink... Wie is hy nou om ons te wil genees. Ons sou eerder ’n dokter uit Jerusalem, of Damaskus, of Egipte, of Athene of Rome verkies. Wat kan boetie Jesus, die seun van die arm timmerman Josef nou vir ons doen! Hy kom dan nog uit Nasaret se onderdorp uit! En so het hulle die geleentheid gemis om genesing te vind...

As dit ek en jy was wat in Jesus se skoene gestaan het, kon dit maklik die einde van ons bediening gewees het! Ons sou geredeneer het... Wat help dit dat ek die wêreld probeer red as my eie mense my nie eers aanvaar nie? As ek nie hier suksesvol is nie, gaan ek nêrens suksesvol wees nie!

Maar nie Jesus nie... Nee, liewe vriende hierdie terugslag spoor hom juis aan... Hy besef net weer opnuut hoe honger die wêreld daarbuite is, en hoe groot hulle nood is... en daarom reageer hy deur sy dissipels twee-twee uit te stuur... Hy hou nie eers met hulle ’n begrotingsvergadering nie... Hy doen nie strategiese beplanning om te bereken waarheen hulle moet gaan, en of almal daarmee gelukkig sal wees nie... Hy vra nie eers of daar dalk nie plaaslik in Nasaret van hierdie mense is wat weer besoek moet word, en mooi gevra moet word om hulle siekes vir die hom te bring nie...

Nee, liewe broer en suster, hy stuur hulle op ’n baie eenvoudige manier uit... Al wat hulle moes neem, was hulle stapstokke. Net met hulle sandale... Geen kos, geen bagasie, geen geld of ekstra klere nie. Nee, net hulle stapstokke en sandale.

Jesus gee aan hulle ’n baie eenvoudige metode. Gaan soontoe, en gaan bly waar jy ingenooi word. Maar daar waar jy verwerp word, vee die stof van jou voete af, en moenie onnodig tyd daar spandeer nie. Laat die persone aan hulle eie lot oor. Gaan aan na ’n volgende huis toe, waar julle teenwoordigheid verwelkom word...

Wat was die gevolg? Die dissipels het twee-twee uitgegaan, en aan mense vertel dat hulle hulle moet bekeer en hulle tot God moet bekeer. En vers 13 leer ons dat hulle baie duiwels uitgedryf het, en baie siek mense gesond gemaak het, terwyl hulle hulle met olyfolie salf.

Vanoggend, hier in die klein gemeente Bospoort, ons gemeente van 120 lidmate, moet ons ook vir onsself afvra: “Ken en waardeer ons Jesus vir wie Hy is? Flip Theron het ’n aangrypende stukkie geskryf in sy boekie Die somer kom saggies, met die titel: “Die Seun van Maria”. Hy sluit aan by ons teksgedeelte en gaan van die standpunt uit dat die mensdom nog steeds wonder oor wie Jesus was. Hy haal aan uit ’n Amerikaanse koerantjie wat die volgende skynlasbrief gepubliseer het: “Gesoek: Jesus van Nasaret, alias die Messias, Seun van God, Koning van die konings, Here van die here, Vors van vrede. Uiterlike voorkoms: lang hare, baard, mantel, sandale. Hy vertoef graag in agterbuurte, het ’n klomp ryk vriende. Vir sy gevaarlike boodskap is veral jong mense ontvanklik wat nog nie oorreed kon word om Hom te ignoreer nie. Hy verander mense en maak daarop aanspraak dat Hy hulle vrymaak. Waarskuwing: Hy bevind Hom nog op vrye voet.”

Die dorpmense van destyds het gedink hulle weet wie Jesus is. Hy het voor hulle oë grootgeword. Hulle ken sy familie. Maar eintlik het hulle Hom nie geken nie.

Ken jy Jesus vir wie Hy is??? Besef jy wat Hy kan doen, en hoe magtig Hy werklik is? Jesus kom dikwels as ’n onbekende mens en op ’n ongewone manier na mense toe – dink maar aan die Samaritaanse vrou by die put, terwyl Hy in die nag op water loop na sy dissipels toe, in die vorm van ’n tuinier na Maria by graf, oppad saam met die Emmausgangers, en terwyl hy kos maak aan Petrus en die ander dissipels by die meer.

Jesus maak moeite met klein gemeenskappies. Hy kon nie sy geboortedorp net oorslaan nie. Maar uiteindelik was Hy nie welkom daar nie. En dit maak juis dat hy meer en meer besef hoe nodig die wêreld daar buite sy innerlike en uiterlike genesing het. Daarom gee Hy sy dissipels die krag om duiwels te gaan uitdryf en mense gesond te gaan maak, sodat hulle in hulle getalle uiteindelik ook so groter dinge as Hy sou doen...

Liewe vriende, die Engelse spreekwoord wat lui: “Familiarity brings contempt”, was deur die eeue dikwels so waar. Die seun van die buurman word dikwels deur ons verag. Daarom is Galileo deur die kerk verban omdat hy beweer het dat die aarde om die son draai, en nie anders nie. Daarom het so baie skilders arm gesterf, terwyl hulle werke eers na hulle dood erken is vir wat dit werklik was...

As jy dus partykeer onseker voel oor dit wat jy vir die Here Jesus doen, is dit belangrik dat jy weereens besef dat jy op God moet vertrou, en nie op die reaksie van mense om jou nie. God sal in die materiële voorsien. God sal in die krag voorsien om die bose en siekte te kan oorwin. God sal voorsien in die vrymoedigheid om aan mense te verkondig dat hulle hulle moet bekeer...

Elkeen in Bospoort is ’n erfgenaam. Maar wat het ons geërf? Ons het nie in die eerste plek die kerk se naam, of die kerkgronde of die kerkgebou van Bospoort van ons voorgeslagte geërf nie. Nee, liewe vriende, ons is in die eerste plek erfgename van God se evangelie, en van die krag daarvan. Ons word geroep om dit te gaan deel...

Is die evangelie vir jou werklik die goeie nuus? Is dit vir jou sulke goeie nuus dat jy dit wil gaan deel, selfs met mense wat niks kan bydra tot ons dankoffers of ons kollekte nie? Is die goeie nuus van die evangelie iets wat jy net in die kerk deel en verkondig, of kan jy dit saam met jou op die pad neem... Glo jy dat jy alles op die pad sal vind wat jy nodig het?

Ons ken almal die Nike – kenteken en slagspreuk. Just do it! As ‘n mens in die oggend wil gaan draf, en dit is koud, of winderig, of jou lyf is moeg, dan is dit dikwels die gedagte aan Nike se slagspreek wat my help om op te staan en dit net te doen...

Waar daar in die lewe baie verskonings kan wees om nie die Here se wil te doen, en gehoorsaam te wees nie... Waar daar baie teenstand van jou familie en vriende mag wees... Kom die Here Jesus vanoggend net weer vir ons sKom die Here Jesus vanoggend net weer vir ons sê: Just do it... Do it for me! Doen dit net. Doen dit vir my! Jy sal die resultate daarvan sien!



AMEN!



“Gees van die lewende God,

wees die tuinier van my siel.

Hoe lank wag ek nou al op U

– stil – in ’n koue winter van my siel.

Maar nou, in die kragtige Naam van Jesus Christus,

waag ek om U te smeek:

Hark weg die dooie blare van die verlede.

Vergruis die harde kluite

van my weerbarstige gewoontes en groewe.

Werk diep in my siel u lewegewende Woord.

Versorg, gee water, koester my hart

totdat die nuwe lewe in my ontkiem, groei en blom.”

(Richard Foster)



Bibliografie:

Van Rensburg, E. 2000. Nog 30 stories vir jong - ore. Wellington: Lux Verbi.

Orsmond, E. & Botha, J. eds. 2011. Preekstudies en liturgiese voorstelle gebasseer op die kerkjaar.

Pinkster Sessie 7 27 Mei 2012

Pinster – Sessie 7 Die Heilige Gees vul ons met tonge van vuur!


Ek is seker die meeste van julle het al van die Krugermiljoene gehoor... Dit gaan daaroor dat daar getuienis is dat President Kruger tydens die Boere-oorlog ’n hele klomp kiste vol Krugerponde versteek het, sodat dit Engelse dit nie kon kry nie. Die probleem was egter dat die geheim van die Krugerponde so goed bewaar gebly het, dat niemand dit tot vandag toe kon opspoor nie...

Ek het ’n vriend, Steve Weaver, wat in Amerika grootgeword het. Hy vertel dat hy daar ’n Ben Viljoen geken het. Die Ben Viljoen het nog ’n Afrikaanse naam gehad, maar hy kon gladnie Afrikaans verstaan nie. Sy oupa het egter nog by hulle gebly, en die oupa was die kind van Generaal Ben Viljoen, een van Paul Kruger se vertrouelinge.

Steve vertel hoe die hulle eendag by Ben gekuier het, en hoe sy oupa vertel het van die Afrikaanse liedjie wat hy so van gehou het. Steve se vrou Kathy, wat goed Afrikaans praat, vra toe of dit nie “My Sarie Marais” is nie. Toe sy die lied begin sing, toe rol die trane by die oupa van verlange.

Maar die eintlike storie agter die interessante storie gaan oor die oupa wat vertel het dat hy eendag as ’n jong seun onder ’n groot boom gesit het, en onthou hoe sy pa saam met ’n klomp ander ooms ’n hele klomp kiste begrawe het. Nodeloos om te sê dat hy gladnie meer kon onthou waar dit was nie... Ja, liewe vriende, tot vandag toe soek mense nog na die Krugermiljoene, omdat die geheim saam met die persone wat geweet het waar dit begrawe was, graf toe is...

Maar, liewe vriende, dit was ook die groot gevaar na Jesus se kruisdood, opstanding en hemelvaart. Die groot gevaar was dat die dissipels daaroor sou stilbly, en dat die ryk boodskap van Jesus se koms na die aarde, en die feit dat Hy vir ons sondes gesterf het en die dood oorwin het, vir altyd verlore sou raak... Dat al God die Vader se opoffering, en Jesus se swaarkry uiteindelik verniet sou wees...

Nadat Jesus op ’n stadium 5000 volgelinge gehad het, het daar na sy hemelvaart net 120 oorgebly. Die gevaar was groot dat die boodskap kon uitsterf. Maar dit sou God nie toelaat nie... Die Goeie Nuus, die Evangelie moes uit!

En juis daarom stuur God Sy Heilige Gees om die geheim, om die boodskap en die groot skat van God se verlossing die ws daarom stuur God Sy Heilige Gees om die geheim, om die boodskap en die groot skat van God se verlossing die wêreld in te dra, en aan almal bekend te maak. Van die begin af was die Heilige Gees baie duidelik en sigbaar in mense lewens. Ons kan sê die Heilige Gees het met ‘n “bang” aarde toe gekom.

Hier in Handelinge 2 lees ons dat die gebou waarin die gelowiges was, geskud het. Daar was ’n geweldige rukwind. Daar het tonge van vuur op elkeen van die gelowiges se koppe verskyn, en hulle het in al die verskillende tale van die omstanders begin praat. Niemand kon dit miskyk nie. Die Boodskap het soos ’n veldbrand versprei. Dit is deur die apostels en die ander wat deur hulle prediking tot geloof gekom het die wêreld ingedra.

Toe daar in die eerste week 5000 gelowiges by die getal van gelowiges gevoeg is, was dit nie genoeg nie... Die golf van die evangelie het voortgespoel... Die Gees se werking was so kragtig dat mense gesond gewond het wanneer selfs Petrus se skaduwee op die mense geval het (Hand 5:15).



Wanneer die apostels gevang word laat ’n engel hulle vry en sê aan hulle in Handelinge 5:20: “Gaan staan in die tempel en verkonding aan die volk die volle boodskap van hierdie nuwe lewe. Wanneer die wagte ontdek dat hulle nie meer in die tronk is nie, staan hulle reeds al weer in die tempel, besig om die evangelie te verkondig! Wanneer hulle weer gevang word, sê Petrus en Johannes aan die Joodse Raad in hoofstuk 5:29: “Ons moet eerder aan God gehoorsaam wees as aan mense!” “... Ons is getuies hiervan, ons en die Heilige Gees wat deur God gegee is aan die wat Hom gehoorsaam is.”

Weet, julle, liewe vriende, ek weet dit is Nagmaal vanoggend, en kategese en gemeentebraai daarna, maar ek dink dit is tyd dat ons vanoggend met Pinkstersondag bietjie gaan stil staan, en werklik vir onsself afvra waar ons rondom hierdie dinge staan... Ons kan baie argumente ophaal, rondom die gawes van die Gees wat dalk al verdwyn het, of die evangelie wat al tot aan die eindes van die aarde verkondig is, of die groot nood aan die evangelie in ons eie omgewing...

Maar die vraag bly vanoggend staan... Is ons nog aan God gehoorsaam?

’n Predikantvriend van my het onlangs gesê dat hy op ’n slim manier met sy gemeente werk... Hy het vir hulle van die begin af vertel hoe goed hulle is, en hulle begin dit nou uiteindelik glo, en dit gaan goed met die verhoudinge in sy gemeente... Kan ons vir mekaar bly vertel hoe goed dit met ons gaan, en hoe goed dit gaan met ons as gelowiges, hoe die Here ons seën, terwyl ons diep in ons harte weet hoe ver ons te kort skiet???

Ek het vanoggend gebid vir ’n tong van vuur, en miskien is dit nie altyd ’n gewilde tong nie. Want God se vuur is nie sommer enige vuur nie. Dis die vuur van die brandende doringbos wat die hakkelende Moses in Eksodus 3 geroep het om die Israeliete te motiveer om uit Egipte te trek, en die hardkoppige Farao te oortuig dat dit wel gaan gebeur. God se vuur is die gloeiende kool waarmee hy Jesaja se lippe in Jesaja 6:11 aangeraak het, sodat sy sondes versoen kan raak en sy oortredinge vergewe kan word.

God se tong van vuur is ook ’n tong van vuur wat die oortredinge en sondes in my eie lewe en reinig. Maar God se tong van vuur kan nie anders as om oor die evangelie te praat nie. God se tong van vuur kan nie anders as om mense aan die brand te probeer steek vir God se evangelie nie...

As ons na ons eie gemeente en na die vervulling van die Gees in Handelinge kyk, dan lyk dit vir ons baie ver en onbereikbaar. Want in Bospoort sukkel ons om mense te kry wat net bereid is om net Sondae – oggende mense by die deure te gaan groet. In ons Pinksterbiduur is daar twee of drie uit vyftig mense wat die vrymoedigheid het om voor ander te bid. Ons was Mighty Men toe en het die banier saam teruggebring en voor die kerk opgeslaan, maar wat het ons werklik daaraan gedoen??? Die banier was verslete voordat ons werklik by die inhoud van die banier uitgekom het, naamlik om die boodskap van God te verkondig.

Ons sal dikwels sê dat ons vir ons eie mense moet sorg... Ons sukkel om vir net een persoon in die gemeenskap op ’n gereelde basis gekookte kos te voorsien. Die haweloses wat met die Gholf iewers gaan staan en die enjinkap oopslaan sodat mense net by hulle kan stop, is vir ons ’n verleentheid... Hoeveel van ons het regtig saam met die fisiese hulp ook ’n geestelike gesprek met die mense gaan voer oor hulle saligheid?

Hoekom sukkel ons so? Hoekom is dit vir ons so moeilik om oor die Here te praat en net vir Hom oor te borrel. Ons sê so baie – “Ja maar ’n mens moet darem nie met die Bybel onder die arm loop nie... Maar as ek my Bybel reg lees, is die groot probleem dat die Bybel nie onder ons arm moet wees nie, maar in ons hart. Die profeet Esegiël het opdrag gekry om die Boekrol te eet (Eseg. 3:1-3). Dit was vir hom soet soos heuning, en hy kon nie anders as om oor die inhoud van die boekrol te praat nie...

Ons beskuldig dikwels kerke soos die Sewendedaagse Adventiste dat hulle Ou Testamentiese kerke met Ou Testamentiese leringe is. Maar uiteindelik, liewe vriend en vriendin, is ons nie baie beter daaraan toe nie. Ons glo dat die Dominee met die Heilige Gees vervul moet wees, en ons bevestig hom met handoplegging voor sy bediening. Maar van die gewone gelowige kom baie min tot sy reg. Die dominee word mos betaal om die evangelie te verkondig, en oor die Here te praat. Hoekom sal ek en jy dit doen?

Ek moes vanoggend weereens vir myself afvra: “Hoekom staan ek vanoggend hier?” Hoekom is ek op 27 Mei 2012 in Bospoort gemeente predikant? En die Here moes net weer vir my herhinner dat ek ook geroep is om die Uitstorting van die Heilige Gees, die vervulling van die Heilige Gees op ELKE gelowige af te kondig. Ek is hier om aan julle te bevestig dat die Heilige Gees vir elkeen van julle sy vervulling belowe. Ek is hier om te sorg dat die arbeiders vir die oes vermenigvuldig word. Om te sorg dat mense wat vir jare al die evangelie goed ken, opstaan en dit met ander rondom hulle deel...

Dit is wonderlik dat ons eerskomende Saterdag ’n kerk in Setlagole wat deur lidmate begin is, gaan inwy? Maar hoe lyk die res van ons prentjie? Hoe ver het ons gevorder met die groei in ons eie gemeenskap, en onder ons plaaswerkers? Hoe betrokke is ons regtig in Judea, Samaria, en tot aan die uiterstes van die aarde?

Maar dan moet ons weereens vir mekaar afvra? Hoekom is dit so moeilik??? Ek glo dat dit in die eerste plek oor die kwaliteit van ons geestelike lewens gaan. In 1 Kor 11:29-30 staan daar oor die Nagmaal: “...want hy wat eet en drink sonder om te besef dat dit die liggaam van die Here is, bring daardeur ’n oordeel oor homself. Daarom is daar so baie swakkes en sieklikes onder julle en sterf baie van julle.”

Ons moet vanoggend ook besef dat ons as gemeente nie vir die Here bruikbaar is as die tonge van die Heilige Gees se vuur ons nog nie gereining het nie. Efesiërs 5:18 sê duidelik dat ons ons nie met drank en losbandigheid moet ophou nie, maar dat ons ons met die Heilige Gees moet laat vervul. As ons harte vol van ander, verkeerde dinge in ons lewe is, dan is daar nie plek vir die Heilige Gees nie. As ek as gevolg van ’n probleem nie eers met my broer of suster praat nie, hoe op aarde gaan ek oorborrel van die Heilige Gees se getuienis in my lewe?

Maar ek glo ook dat een van die groot redes vir ons gebrek aan vrymoedigheid in die gemeente, is dat ons tevrede is met wat ons doen, en wat ons bereik. Ons dink dat ons darem beter doen as ander gemeentes... Ek onthou nog in ’n vorige gemeente hoe iemand toe sy vir ’n werk moes aansoek doen, net vir my kom sê het dat sy op haar CV gesê het dat sy by ons kerk se gemeenskapsaksie betrokke is, terwyl sy eintlik niks daarmee te doen het nie. Sy wou maar net haar gewete sus, deur dit wel te bely...

As die Heilige Gees jou vervul, en sy tong van vuur op jou bring, kan jy nie maar net ’n passasier bly nie. Dan word jy ’n soldaat, wat die Woord van die Here sonder ophou en met ywer uitdra deur jou woorde en deur jou dade, waar jy ookal kom...

AMEN!

Pinksterweek 2012 Sessie 1

Pinsterweek 2012 - Op weg na vervulling…


Het jy al in ’n krisis in jou lewe beland waar net God kon help... Waar jou finansiële situasie net vir jou te veel was? Waar geen dokters jou meer kon help nie, en geen raad gehad het met jou siekte nie? Waar jy in so diep donker put was dat niemand jou op geen manier kon opbeur nie? Waar jy heeltemal in jouself begin twyfel het, en nie meer enige sin in jou bestaan hier op aarde gesien het nie?

Ek is seker dat die meeste van julle al so ’n situasie in julle lewens ervaar het... Miskien is jy tans in ’n situasie waar jy net nie weet hoe jy gaan oorleef nie. Alles in jou gedagtes spel ’n doodloopstraat, waaruit jy nie kan kom nie...

Dan glo ek dat Pinkster 2012 in besonder vir jou is... Dat die Here ook tydens Pinkster 2012 in besonder vir jou ware vervulling in jou lewe wil laat smaak...

Daar is baie foefies of namaaksels in vandag se lewe wat aan mens vervulling bied. Dikwels word daar in drank of rookadvertensies gesinspeel daarop dat ’n sekere alkoholiese drank of spesiale sigaret jou na die paradys sal neem. Toe ons jonk was, was daar die sigaret-advertensie wat gelui het – “after action, satisfaction”. Ons sien dikwels advertensies oor “The power of positive thinking.” Maar uiteindelik is baie van hierdie programme net ’n masker. Want dit probeer voorgee dat jy van jou probleme kan ontsnap deur net positief te dink.

Daarom wil ek graag vanaand met Hemelvaart, vir ons weer uit Romeine 8:9-11 lees, waarna ons spesifiek weer gaan kyk na wat dit beteken om werklik te lewe, en deur die Gees lewend gemaak te word.

Boodskap:

'Dead' man wakes up at his own funeral

The funeral of a 28-year-old waiter in southern Egypt turned into a celebration when he woke up after being declared dead.

In die afgelope week was daar ’n nuusberig oor ’n begrafnis wat in ’n fees verander het. ’n persoon in Egipte, Hamdi Hafez al-Nubi het tydens sy begrafnis weer lewend geword... Nodeloos om te sê dat sy ma flou geword het toe die dokter wat die doodsertifikaat kom uitskryf het, aan haar gesê het dat haar seun lewe.

Mense beskryf baie dikwels die kerk van vandag as ’n begrafnis. Hulle reken dat ons godsdiens dood is. Dat daar net nie meer lewe in ons Christene oor is nie... en tog gaan die hele Christelike Godsdiens oor ’n begrafnis wat in ’n fees verander het. Ja, die Begrafnis van Jesus Christus het nie net die Sondag daarna op die sy opstanding uitgeloop nie, maar het 40 dae na sy dood ook op sy Hemelvaart uitgeloop, waarna die gelowiges kon feesvier toe die Heilige Gees op hulle uitgestort is. Pinksterfees was ’n fees van lewe... En daarom nooi ek jou vanaand saam op die reis om te ontdek hoe die Gees van Christus in besonder gekom het om lewe in Christus se liggaam, sy kerk te blaas.

In die mediese wetenskap het die woord dood baie betekenisse. In die ou tyd het hulle gereken dat iemand dood is as sy hart gaan staan het. Daarna het mense slimmer geword, en gesê dat as iemand vir vyf minute nie suurstof kry nie, dan begin sy brein doodgaan. En vandag is die mees algemene beskrywing van iemand wat dood is, wanneer iemand breindood is. Iemand se hart kan klop, maar as sy brein dood is, dan word die masjiene afgeskakel, omdat dokters glo dat hy dan nie meer sal kan lewe nie...

Dikwels in die geskiedenis was God se skepping, die mens amper dood... God het Adam en Eva belowe dat hulle sou sterf as hulle van die vrugte van die boom van kennis van goed en kwaad eet, en hulle het ook, al was dit ’n hele ruk later. Maar nadat Adam en Eva van die vrugte geëet het, het alles eintlik verander. Niks was meer dieselfde nie, want die mens was tot die dood verdoem.

Maar vir God is die dood van sy kinders geen geringe saak nie (Ps. 116:15). God het in die doodsheid van die volk Israel se lewe elke keer kom lewe spreek. Een van die bekendste voorbeelde daarvan is die visioen van Esegiël in Esegiël 37 waar Esegiël in die doodsbeendere lewe ingeblaas het, en waar die bene weer mens geword het. Dit is na aanleiding van die visioen wat die Here in vers 13 en 14 van Esegiël 37 aan Israel kom sê: “Wanneer ek julle grafte oopmaak en julle laat uitkom, my volk, sal julle besef dat ek die Here is. Ek sal my Gees in julle laat kom sodat julle kan lewe en Ek sal julle in die land laat woon. Dan sal julle besef dat Ek die Here is. EK het dit gesê, en ek sal dit doen, sê die Here.”

Liewe vriende, wanneer ons oor Pinkster dink, dan dink ons dikwels aan die Heilige Gees wat kom as die Trooster. Ons dink aan die Heilige Gees wat aan die dissipels sou krag gee om God se getuies te wees. Ons dink aan die Gees wat in ons plek tot God die Vader bid. Maar ons besef dikwels nie dat die Gees juis gekom het om die lewe wat Jesus deur sy kruisdood en opstanding vir ons gebring het, werlklikheid te maak nie. God belowe dat Hy sy Gees in ons sal laat kom, sodat ons kan lewe...

Een van die duidelikste gedeeltes waar die Gees as lewe na vore kom, is ons teksgedeelte van vanaand. In Romeine 8:6 staan daar duidelik dat die dinge waarmee die Sondige natuur hom besig hou, op die dood uitloop. Maar wanneer die Gees van ons besit neem, verander ons lewens totaal. En daarom staan daar in vers 9:”Julle word beheer deur die Gees, omdat die Gees in julle woon.”

Die Heilige Gees het nie net vir Christus uit die dood opgewek nie, maar wek ook ons elkeen uit die geestelike dood op. Wanneer mens in die greep van die sonde is, wurg dit ’n mens stelselmatig dood, maar die Heilige Gees kom maak ons vry, en gee aan ons lewe. Daarom leer 2 Korinthiërs 3:6 ook aan ons dat die letter van die wet doodmaak, maar dat die Gees lewe gee.

Die Heilige Gees het dus ook spesifiek gekom om lewe in Christus se liggaam in te blaas. Deur die uitstorting van die Heilige Gees het die gelowiges lewe en krag ontvang om vir die Here te gaan getuig, ten spyte van die teenstand wat hulle sou verduur.

Hierdie selfde Gees wil ook in ons lewe uit die dood kom wek. Die Heilige Gees wil vir jou en my vervul, sodat ons werklik vir God kan lewe. Maar ons moet onsself vir Hom oopstel, en ons alles aan Hom gee. Linda Wright gebruik die beeld van die blou albaster, om te verduidelik dat ons onsself ten volle aan die Here moet oorlaat.

Sy vertel die verhaal van Jannie en Sannie, waar Jannie vir Sannie met ’n sak vol sjokolade sien, en baie lus kry daarvoor. Toe hy Sannie vir die sjokolade vra, sê sy aan hom dat sy dit vir al sy albasters sal ruil. Jannie het egter ’n blou albaster gehad waarvoor hy baie lief was. Omdat hy geweet het dat die albaster ’n rif het, voel hy in sy sak, hou die albaster eenkant, en gee aan Sannie die res van die albasters.

Nadat Sannie aan hom haar sjokolades gegee het, stap hy toe so ent weg, maar draai om en vra vir Sannie – was dit al die sjokolade? Omdat Jannie nie volledig kon gee nie, kon hy ook nie vertrou dat Sannie alles gegee het nie. As ons dele van ons lewe vir die Heilige Gees terughou, kan ons ook weet dat die Gees ons nie werklik totaal kan vervul nie. Ons moet bereid wees om alles aan Hom oop te stel. Ons moet bereid wees om die volle waarheid oor ons sonde en ons lewe te praat.

Ek sluit af met ’n verhaal uit die film “Dead man walking”, ’n film waarin Sean Penn en Susan Sarandon gespeel het. Die film gaan oor ’n man wat ter dood veroordeel is vir ’n moord. ’n Non het hom gereeld besoek, maar hy wou nooit erken dat hy wel die moord gepleeg het nie. Oppad na die dodesel het hy egter erken dat dit hy was wat die moord gepleeg het, en die boodskap van die film is dat die waarheid van Jesus se vergiffenis hom vrygemaak het... Al is hy dus terreggestel, kon hy vrykom, omdat hy die waarheid oor sy lewe kon bely.

Ek glo dat die Waarheid oor die Heilige Gees se rol in ons lewe noodsaaklik is om werklik as ’n kerk die Here te kan dien, en as ’n lewende gemeente in hierdie wêreld te kan werk. Ons moet besef dat die die Gees is wat lewe gee, en ons werklik die krag en genade gee om getuies vir die Here in hierdie wêreld te wees. Mag die Gees ons ook elke dag inspireer meer en meer vir Hom te lewe!



Amen

Buig voor die leë kruis!

Jesaja 52:13-15 Boodskap vir Paassondag (oggend) 2012.

Skriflesing:

Jesaja 52:13-15

Buig jou neer voor die leë kruis!

Voorsang:

Ons is almal hier tesaam medley

Flam 6 Heer Jesus, my Redder!

God is goed, Hy lewe

Hy is Heer

Lofsang:

Lied 175 (2*) Majesteit

Na Wet:

Lied 514:1,2 Ek weet verseker dat Jesus leef.

Slotsang:

Lied 409 Hoor jy die Paasfeesklokke.

Ek is al weer vanoggend met Van der Merwe besig, maar hierdie keer is dit 'n positiewe Van der Merwe storie... Destyds het die storie geloop dat Van der Merwe al die belangrike persone in die wêreld ken. 'n Vriend van van der Merwe wed hom toe dat hy nie vir George Bush, die president van Amerika ken nie. Van der Merwe neem hom toe saam na die Wit huis in Washington toe, en daar kry hulle 'n afspraak met George Bush. Toe George Bush vir Van der Merwe sien, straal hy van blydskap, en vra hy hom onmiddelik... "Van der Merwe, it is good to see you! How are you!"

Van der Merwe was verstom, en het Van der Merwe ook na die Russsiese President, en Koningin Elisabeth van Engeland toe geneem... Elke keer was die reaksie dieselfde, en was dit baie duidelik dat hulle bly is om Van der Merwe te sien. Van der Merwe se vriend dink toe by homself:... Dit is alles goed en wel, maar ek is seker dat Van der Merwe nie die pous ken nie.

Hulle gaan toe na die Vatikaan in Rome, waar die pous bly. Vanweë die streng sekuriteit moes Van der Merwe se vriend tussen die skare bly staan, maar Van der Merwe sou saam met die Pous, die hoof van die Rooms-Katolieke Kerk, bo by die balkon uitkom. Toe van der Merwe saam met die Pous op die balkon uitkom, wou Van der Merwe se vriend net graag seker maak dat dit wel die Pous is wat daar by Van der Merwe staan... Hy vra toe vir die ou wat langs hom staan... "Wie is daardie ou met die wit klere aan. "Ek weet nie, antwoord die ou, maar die ou langs hom is Van der Merwe!"

Ek weet nie van vandag nie, maar toe ons klein was, was dit die ideaal van baie graad eentjies om eendag president van die land te word. Hulle wou nie soseer Harry Oppenheimer of Anton Rupert, die ryk miljoenêrs van daardie jare geword het nie. Nee, vir hulle was dit belangriker om die mag, die persoonlikheid en die belangrikheid van die president van 'n land te kan hê.

In die tyd wat Jesaja hierdie boek skryf, is dit duidelik dat die volk Israel baie verward was. Nie lank terug nie, is Serrubabel, hulle leier, deur goewerneur Tattenai van Persië doodgemaak. Hulle was verslae... Maar gelukkig het koning Darius van Persië gekom, en Tattenai kom berispe. Hy het Serrubabel se naam in ere herstel, en beveel dat die tempel herbou moes word. Tattenai moes hom heeltemal daaruit hou.

Wanneer Jesaja dan oor die Kneg van die Here praat, is dit belangrik dat die volk alreeds verstaan het dat goeie leiers dikwels eers moet sterf voordat hulle werk regtig voltooi word. En juis daarom was die voorspelling van 'n Dienskneg wat sou kom en ly, maar uiteindelik die oorwinning sou behaal, vir hulle so belangrik...

In Jesaja 42:13 lees ons van die Dienskneg wat sou kom, en baie lyding sou verduur. Hy sou so swaar kry, en vermink word, dat niemand hom sou erken nie. En tog, sou hierdie Dienskneg oorwin, en sou die konings van die aarde in verwondering voor hierdie Dienskneg juig...

As ons vandag, op Paassondag, 2000 jaar terug, na die oorwinnende Jesus buitekant die graf sou kon kyk, dan sou ons dalk iets kan verstaan van Jesaja 52:13, waar die Here God sou sê: "My dienaar sal voorspoedig wees, Hy sal hoog in aansien wees. Almal sal hom eer...". En in vers 15: "Baie volke en hulle konings sal stom wees van verbasing... Want hulle sal sien wat niemand hulle vertel het nie, en hulle sal hoor wat hulle nog nooit voorheen gehoor het nie." Eugene Petersen beskryf dit so mooi in die Message vertaling: "Just watch my servant blossom! Exalted, tall, head and shoulders above the crowd!".

Ja liewe vriende, op hierdie Paassondag kan ons mekaar groet met die woorde: "Christe aneste!", wat beteken "Jesus het opgestaan!". Ons het in die lydensweke wat verby is gesien hoe swaarkry, verwerping, vernedering, bloed en skande deel van Jesus se pad op aarde was... Maar vanoggend kan ons sy opstandig vier, en weet... "Christus leef!"

Wanneer iemand ryk geërf het, en maar net ryker word, het baie mense nie vir hom respek nie... Hulle sal net sy rykdom aan sy ouers se rykdom toeskryf. Maar wanneer iemand arm geword het, en alles verloor het, en dan weer opstaan en deur harde werk voorspoedig word, kyk almal met verwondering na daardie persoon.

Net so lê die verwondering en die verbasing van die nasies en die konings oor Jesus juis daarin dat Hy gesterf het, dat Hy dood en begrawe was, maar weer opgestaan het... Dink hoe het die Satan gesidder en gebewe op Paasoggend, nadat hy in die hel feesgevier het oor Jesus se dood. Jesus was terug! En nou in meer glorie en mag as ooit tevore... Jesus het die dood oorwin! Hy het opgestaan! Hy lewe!

Ons kniel vanoggend nie meer voor 'n kruis met 'n liggaam op nie. Want Jesus het oorwin! Die simbool van skande het die simbool van oorwinning geword! Hy is die hoof en leier van die kerk, Hy is die Koning van die Konings, die Here van die Here, die Heerser oor die Heersers!" Hy is Oorwinnaar!

Maar wat beteken dit vir jou en my? Watter verskil maak dit in ons lewe??? Ek dink nie ons kan begin om werklik te dink oor watter verskil Paassondag aan die lewe van 'n gelowige moet maak nie... Want ek glo dat Paassondag, en nie Kersfees nie, die belangrikste dag in ons jaar moet wees... Ek weet nie eers of ons regtig die Vrydag wat verby is Goeie Vrydag kan noem nie... Want daar was eintlik niks goeds aan daardie dag waarop Christus die helse smart moes beleef en verneder word nie.

Maar Paassondag, Ja, dit is 'n rede vir feesvier! Dis 'n rede vir juig! Want sonder Jesus se opstanding sou sy sterwe niks beteken het nie. Sonder die boodskap van 'n nuwe lewe sou die boodskap van Jesus se sterwe waardeloos gewees het... In die eerste plek is vandag 'n dag vir feesvier, vir blywees vir jubel en juig!

'n Tweede verskil wat Paassondag aan ons lewe maak, is die nuwe hoop en inspirasie wat dit gee. Waar ons Vrydag verslae huistoe gery het, en gedink het... Dit kon ek gewees het... Kan ons vandag juig en sê: "Dit gaan ook ek wees!"Want, leer Filipense 3:10 en 11 ons: "Deur saam met Hom te ly kry ek deel aan sy dood in die hoop dat ek die opstanding uit die dood kan beleef!".

Ja, omdat die hoof van die kerk, die ligaam, opgestaan het en leef, kan sy hele kerk opstaan uit die dood. Kan sy hele kerk werklik begin leef, en sy naam grootmaak, soos ons geroep word om te doen. Omdat Christus vir jou opgestaan het, kan jy ook opstaan en begin lewe! Kan jy ook vry kom van die kettings van jou doodsbestaan!

Maar Christus se opstanding maak ook 'n derde, en baie belangrike verskil aan ons lewens. As Christus uit die dood kon opstaan, is dit die bewys dat daar niks op hierdie aarde wat meer onmoontlik is nie. Is daar geen doodloopstraat wat te dood is om nie 'n positiewe uitkoms te hê nie. Omdat Christus uit die dood kon opstaan, is daar geen mens wat nie kan verander nie. Omdat Christus uit die dood kon opstaan, is daar geen verhouding wat nie herstel kan word nie... Omdat Christus uit die dood opgestaan het, is daar geen siekte wat nie genees kan word nie. Is daar geen sondaar wat nie gered kan word nie...

Besef jy dit? Glo jy dit? Ek sluit af... Een van die ergste dinge wat met 'n land kan gebeur, is dat sy president vermoor word... Ek is seker dat daar van julle is wat nog kan onthou hoe dit was toe President Verwoerd vermoor is. Of hoe dit in Amerika was toe President Kennedy geskiet is. Die dood van 'n leier het 'n totale verlammende uitwerking op enige land.

Een van die filmtonele wat my altyd sal bybly is die toneel uit Lawrence of Arabia, waar Lawrence as die bevryder van Arabië na 'n veldslag aan sy wonde sterf, maar hoe hulle sy stywe lyk in 'n sittende posisie op sy wit perd vasgemaak het, en sy perd laat voor jaag het in die laaste, finale veldslag. Net die beeld van die leier op die wit perd, het gemaak dat sy volgelinge daardie laaste, finale veldslag wen...

Hoeveel meer, liewe vriende, is die sekerheid nie daar in ons harte dat Jesus, ons Ruiter op die wit perd, die Satan en sy magte finaal gaan verslaan as hy op die wolke verskyn, om ons saam met hom te neem nie. Hoeveel te meer, beteken Jesus se opstanding uit die dood nie dat daar NIKS meer is wat die Satan kan doen om ons te oorwin nie. Want ons Koning, ons Hoof, ons Leier, Jesus Christus, het klaar oorwin. Hy het die hef in die hand... Hy lei ons elke dag, sodat ons saam met Hom die Nuwe Jerusalem sal kan binnery!

AMEN!

Jesus dra jou skande…

Goeie Vrydag – 6 April

Skriflesing:

Johannes 19:1-16

Tema:

Jesus dra jou skande!

 

Voorsang:

Daarom

Ek soek U, O God

Gebed

Herder Heer,

 

Lofsang:

Lied 240:1,2 Heiland as in ootmoed stil

Voorbereiding van tafel:

Ek staan skuldig voor U Heer

Slotsang:

Lied 396:1-4 Aanskou die Heiland, sien die kruis

 

Boodskap:

Ek wonder wat is die grootste skande wat jou nog oorgekom het… Dalk het jy in graad 1 per ongeluk in die klas jou broek natgemaak, omdat jy bang was om vir juffrou te vra om "kamer te verlaat". Ek het nou die dag 'n groot skande oorgekom. Ek het voor 'n groot saal kinders 'n stoel stukkend gesit, en al die kinders het vir my gelag.

Daar is ook ander skandes wat 'n mens kan oorkom, wat nog slegter is vir 'n mens en jou familie. Vir 'n familie is dit baie sleg as 'n vrou swanger raak voor die troue, en veral as sy nog met 'n groot, swanger maag voor die kansel moet staan. Dit is ook 'n groot skande as 'n famlilielid van 'n misdaad soos verraad en korrupsie beskuldig word.

In gister se Beeld is daar 'n storie van 2 tydelike landdroste wat aangekeer is vir gewapende roof. Dit is darem die toppunt. Dat iemand wat oor ander se oortredings 'n beslissing moet vel, self so iets soos 'n gewapende roof moes pleeg... Maar hulle is nog nie skuldig bevind nie. Hulle is nog VERMEENDE MISDADIGERS, en hulle skuld moet nog bewys word.

Maar dink aan die koerantopskrifte op die oggend van Paasmaandag, die jaar 33 na Christus: Dit moes soos volg lui... Man sterf pynlik nadat Hy aan Godslastering skuldig bevind is...

Die berig sou al die grusame besonderhede dra... Pilatus wou hom eers nie skuldig bevind nie. Die Jode het hom gedwing. Hy het nog vir Barabbas in sy plek ook vrygelaat... Gewoonlik is die kruisiging eenkant gehou vir die grootste oortredings. Vir spioene en verraaiers, massamoordenaars en terroriste.

Jesus is met 'n sweep met stukkies yster in oor sy rug geslaan. Hulle het 'n kroon van dorings gevat en op sy kop gedruk, dat die bloed uitloop... Hulle het hom uitgetart... Hulle het kamtig nederig voor hom kom kniel, en dan opgestaan en hom deur die gesig geklap. Hulle het hom bygedam en hom met die vuis geslaan.

Jesus moes na alles na Golgota, die plek van die kopbene, strompel met die kruis op sy skouers. Hy is tussen twee van die grootste reeksmoordenaars in Palestina opgehang. Een van die moordenaars het Hom nog gespot en gesê: Is U dan nie die Christus nie? Red uself en ons ook, en kom van die kruis af... (Lukas 23:39). Toe hy dors gehad het, het die soldate aan hom bitter asyn op 'n stok gegee. Hulle het sy sy met 'n spies oopgekloof om te kyk of hy regtig dood is...

Watter vernedering, watter skande het nie op hierdie Vrydag 2000 jaar plaasgevind nie. Maar Jesus het geweet wat kom... Hy het geweet dat daar vir hom 'n bitter tyd voorlê. Hy het bloed gesweet in die tuin van Getsemane terwyl Hy gebid het: "Vader, laat hierdie beker by my verbygaan." Kan ons ons hoegenaamd indink watter skande Jesus moes verduur... Ek dink nie ons kan nie. Maar weet julle, liewe vriende, dit is ook tyd dat ons moet probeer...

As die skrywer van die boek Hebreërs daar in die eerste paar verse van Hebreërs 12 die Christene in hulle lyding aanmoedig, dan moedig hy hulle aan om Jesus, die Begin en Voleinder van die geloof voor hulle oë te hou. Wanneer ek in die verlede hierdie gedeelte gelees het, het ek altyd gedink aan die skare getuies wat in die hemel juig as ek daar aankom, met Jesus wat met ope arms op die troon vir my sit en wag.

Maar ek moes ook in hierdie Lydenstyd verder as dit lees... Ek moes lees dat ek Hom voor oë moet hou wat die kruis verduur het sonder om vir die skande daarvan terug te deins. Ek moet ook die bebloede, dors, en gepynigde Jesus voor oë hou wat homself ingehou het elke keer as iemand hom uittart, hom spot, hom met 'n vuis in die gesig slaan. Jesus wat die ander wang gedraai het elke keer as iemand hom geklap het... Wat homself so in toom gehou het, dat Hy selfs vir die joelende skare kon bid en kon vra: "Vader, vergeef hulle, want hulle weet nie wat hulle doen nie."

Ja, liewe vriende, al wil ons nie graag nie, móét ons. Ons moet ook na Jesus kan kyk as die een wat gely het. Jesus as die een wat die skande moes ondergaan. Want Jesus se skande is dit wat ons geloof anders maak... Ja, Jesus, die koning van die heelal, word soos 'n vel aan 'n stuk hout opgehang. Jesus, die onskuldige, word deur Pilatus skuldig bevind ter wille van ons...

Daar word vertel van 'n man wat uit Mosambiek na Suid-Afrika wou vlug. Hy het toe ooreengekom met mense wat jou teen 'n prys help om op 'n sekere plek deur die grensdrade te kom. Nadat die mense die man gehelp het om deur die grens te kom, het hy aan hulle gesê dat hy nie geld het om hulle te betaal nie. Hulle het hom toe met die vuis bygedam en behoorlik geslaan. Toe antwoord hulle hom dat hy nou betaal het...

Liewe vriend en vriendin, ek glo dat daar niemand hier is wat nie al skandes in die lewe oorgekom het nie. Watter pyn sou ek en jy moes verduur as ons werklik vir ons sondes moet boet? Hoeveel vuishoue sou ons moes kry? Hoeveel van daardie geselslae sou ons moes kry? Danksy dit wat Jesus vir ons gedoen het is dit nie meer nodig nie... Hy het klaar betaal...

Maar die stryd is nie verby nie... Totdat Jesus weer kom, gaan ons as sy kinders nog dikwels onskuldig moet ly. Ons gaan baie moeilikhede verduur omdat ons sy kinders is. Dit kan mos nie anders nie? Paulus leer ons duidelik in Fillipense 3:10 dat die wat deel gekry het aan sy opstanding ook deel sal hê aan sy lyding en dood, sodat ons uiteindelik die hemelse kroon saam met Hom sal erf.

Ek sluit af... Jan-Harm Taljaard vertel aan my 'n skokkende verhaal... Hy het laas naweek vir sy verjaardag 'n gratis vlieg-opleidingsessie by sy vrou as persent gekry. Maar toe hy by die vliegveld sit en wag dat dit sy beurt is, het die vliegtuig net nie teruggekom nie. Die persoon wat voor hom opleiding gekry het, het saam met die instrukteur geval, en hulle is beide op slag dood.

Julle kan net dink hoe hy teruggery het huis toe... Sonder om 'n woord te sê...

Terwyl hy daaraan dink hoe maklik dit HY kon gewees het. Net so sit ons elkeen vanoggend hier. Ons behoort daaraan te dink wat sou gebeur het as Jesus nie gekruisig is nie. Dan was dit ek en jy... Dan sou ons daardie lyding moes deurgaan. Mag elkeen van ons in hierdie tyd ernstig stil word, en dink aan wat Jesus vir ons gedoen het. Mag dit ons inspireer om werklik ook die skande en die lyding wat oor ons pad kom, ter wille van Hom te dra...

 

AMEN!

Heb 9:9-15 Jesus kom skenk sy bloed – vir jou!

Boodskap gelewer op Sondag 1 April 2012

 

Daar word die grusame grappie vertel van Jannie wat van die skool af kom met 'n neus wat vol bloed is. Sy ma was onmiddellik baie ontsteld, en het gevra wie dit gedoen het. "Dit was Pieter", het Jannie geantwoord. "Sal jy hom kan herken?", het sy ma gevra. "Ja," het Jannie geantwoord, "Ek het sy oor in my sak".

Jy sal my dalk vanoggend dalk vreemd aankyk, en dink, maar so 'n grappie hoort nie eintlik in die kerk van ons Here Jesus nie. Dit is sommer net bar en ongepas. Die kerk is 'n plek waar 'n mens moet kan stil word en ontspan. Veral in die lydenstyd van Christus moet alles in 'n sagte kleur van pers gedrapeer wees, en alles moet diep en ernstig en stil wees. Ons moet tyd hê om onsself te kan afsonder van hierdie wêreld, en rustig te word...

Maar weet julle, liewe vriende, as 'n mens mooi na die wêreld om ons kyk, dan is bloed en vergelding 'n wesentlike deel van ons lewens, of ons dit wil weet of nie. Die kans dat daar op hierdie naweek iemand in of van die Bospoort omgewing gebloei het amper honderd persent. Hetsy dit iemand was wat in 'n ongeluk was, of wat in 'n dronk geveg tussen plaaswerkers was, of wat in die werksituasie homself beseer het, Iemand het waarskynlik gebloei.

Dan praat ons nie oor die koerantopskrifte van skole se sportspanne wat in busongelukke was, of van plaasmoorde en plaasaanvalle wat in die afgelope tyd plaasgevind het nie. Dan praat ons nie van stakings, protesoptogte en betogings in ons land waarin mense beseer is nie. Of van gesinsgeweld waarin mense dikwels aan die binnekant meer bloei as aan die buitekant. Dan praat ons nie van Somalië, die Kongo of Mali, van Sirië, Palestina of Libië waar daar tans nog oorlog is nie.

Ons elkeen het waarskynlik in die films of advertensies wat ons in die naweek gesien het, bloed gesien... Ek onthou dat meer as een van die rugbyspelers in die Super 15 tydens die naweek bloed aan hulle gesigte gehad het. Nou praat ek nie eers van die rofstoeiers in WWE nie.Maar in die kerk moet ons liewers nie van bloed praat nie. Dit pas nie hier nie. Ons moet iewers kan ontvlug en ontsnap van die gewelddadige wêreld waarin ons leef.

En tog is die Bybel vol bloed... Dink maar vir 'n oomblik aan Kain wat vir Abel doodgeslaan het. Wat staan in Genesis 4:10 – Wie weet wat daar staan... God sê aan Kain: "Die bloed van jou broer roep na my waar dit op die grond geval het..." Kain het nie vir Abel liggies verwurg, of stilletjies vergiftig nie. Nee, dit moes 'n grusame, bloedige geveg gewees het. En so kan ons verder gaan... In die tabernakel van die Here en in die tempel het daar nie 'n dag verby gegaan wat daar nie bloed gevloei het as die offers gebring is nie. Dink aan Simson wat 1000 Fillistyne met 'n esel se kakebeen doodgeslaan het. Dink aan Koning Dawid, wat so baie bloed aan sy hande gehad het dat hy nie toegelaat is om die tempel te bou nie.

Ons kan die hele dag oor verhale van bloed in die Bybel gesels, maar in hierdie Lydenstyd is dit niks meer as gepas dat ons oor die bloed wat aan Jesus se liggaam gevloei het, praat nie. Want vir Jesus se dood om enigeiets vir ons te beteken, moes daar bloed gevloei het... In Hebreers 9:22 staan daar duidelik... Sonder Wabloedvergieting vind daar geen vergifnis van sonde plaas nie...

Ja, liewe vriende, Jesus se bloed moes vloei. Jesus moes gegesel word vir ons sondes, sodat sy bloed kon vloei... Daar moes 'n doringkroon op sy kop geplaas word, sodat sy bloed kon vloei. Daar moes spykers deur sy hande en sy voete gekap word, sodat sy bloed kon vloei... Daar moes 'n spies deur sy sy gesteek word, sodat sy bloed kon vloei.

Wanneer Johannes die eerste keer vir Jesus sien (Joh. 1:29), wys hy na Jesus en sê: "Kyk, daar is die Lam van God wat die sondes van die wêreld wegneem...". As ons hierdie prentjie sien, dan sien ons Jesus in pragtige wit klere, wat met 'n ligglans omring na Johannes aangestap kom. Maar daardie uitroep moes ook soos 'n dolk in Jesus se eie hart, en die Vader se hart gewees het. Want hulle het geweet dat hierdie lam oppad is om geslag te word. Dat hierdie lam se bloed sou vloei. Dat hierdie lam gekom het as die offer, gekom het om te bloei...

Hoekom so 'n bloedbevlekte preek vanoggend? Hoekom so 'n morsige preek...? Want, liewe vriende, daar was niks moois aan Jesus se kruisdood nie. Elkeen wat al die film, "the Passion of Christ" gekyk het, sal dit weet. Jesus se kruisiging het oor niks anders gegaan as 'n klomp bloeddorstige Jode wat die bloed van Jesus gesoek het, en dit gekry het nie. Wat Jesus se bloed gekry het, sodat daar vir die wêreld vergiffenis van sonde kon wees nie. Wat Jesus se bloed gekry het, sodat ons kan Nagmaal gebruik, en weet dat Jesus as 'n offer vir ons gesterf het nie, 'n Paaslam wat sy bloed vir ons geoffer het.

In hierdie paastyd sien ek hoe daar NG Gemeentes is wat selfs melksjokolade lammetjies uitdeel om te eet. Is dit waaroor Paasfees en Jesus se dood werklik gaan? Gaan dit oor die geleentheid om weg te lê aan daar die bokse paaseiers met die malvalekker binnekant waarvoor my twee dogters, (en ekself) baie lief is? Of gaan dit oor die verhaal van Jesus se bloed, wat in liters gevloei het op Goeie Vrydag?

Toe Jesus daar in Johannes 6 vers 54 aan die skare sê: "Ek verseker julle, as julle nie die liggaam van die Seun van die Mens eet en sy bloed drink nie, het julle nie deel aan die lewe nie.", is daar baie wat omgedraai het. Hulle het aanstoot geneem weggestap en gesê: "Maar hierdie woorde is darem te kras."

Ek kry Vrydag 'n e-pos rondom lesings van Kenda Dean, 'n professor aan Princeton Seminarium. Sy beweer dat die jeug van vandag in 'n valse godsdiens ingelei word. Sy beweer dat ons in 'n teddiebeer godsdiens glo. Ons dien net die Here om getroos te word in ons omstandighede, om gerus gestel te word oor ons lewens, sonder dat ons naastenby die eise van Christenskap in ons lewens besef.

Liewe vriende, ook in 2012 dink ons terug aan die bloed van Jesus wat aan die kruis vir ons gestort is. Dit is juis gedoen, en Hebreërs 9 leer ons juis dat ons gewetens deur hierdie bloed gereinig is. Ook hierdie Paasfees het ons die keuse om Jesus se bloed te ignoreer, en voort te gaan asof dit liewer te grusaam vir ons is... Of ons kan werklik met hartseer gaan terugdink aan wat die wêreld aan Jesus gedoen het, sodat ons kan leef. Ons kan met blydskap besef dat ons nie meer offers hoef te bring soos die Jode van destyds nie...

Ek sluit af... Ek kry hierdie week in my e-pos 'n boodskap oor 'n 100 persent boer. 'n Honderd persent boer, sê hulle, is iemand wat tot diep in die winter nog met 'n kortbroek loop, wat net drie Engelse woorde ken: "Yes, no, en 'vat vrou, hulle praat alweer Engels'. 'n Honderd persent boer is iemand wat altyd 'n stuk binddraad, 'n tang en 'n rol isoleerband (isolation tape) in sy bakkie het. Maar die een eienskap van 'n honderd persent boer was nogal vir my treffend. Daar word gesê dat hy tot drie keer 'n dag iewers bloei sonder dat hy dit agterkom. Wat dit eintlik sê, is dat hy so besig is met sy harde werk, dat hy nie agterkom wanneer hy hom stukkend stamp of skuur nie.

Eintlik behoort dit van 'n Christen ook waar te wees. Ons gaan baie stampe en stote van die samelewing kry. Jesus sê dan aan sy dissipels dat hy hulle soos weerlose skape tussen wolwe instuur (Matt. 10:16). Die wêreld gaan ons baie wonde toedien... Maar in hierdie Paastyd kan ons weereens besef dat ons kan volhard, omdat Jesus reeds die prys vir ons betaal het, omdat Sy bloed reeds vir ons gevloei het.

 

AMEN!

Boodskap vir Jeugdiens op Sondag 25 Maart 2012.

Skriflesing Johannes 12:34-36

 

Tema: Julle moet kinders van die lig wees!

 

Voorsang:

As ek in die aand na sterre kyk

Beeld van God

Ek het sy vreugde

Ek is veilig in Jesus se arms.

 

Lofsang:

In die hemel is die Heer

 

Na Wet:

Hy leef, Hy leef Hy leef hier in my hart

 

Slotsang:

Lied 488 Helder Skyn U lig vir die nasies

 

Tema: Julle moet kinders van die lig wees!

 

Ds. Johannes: More Bekkie!

Bekkie(gebliddoek): More doom. Johannes, waar's jy vanoggend?

Ds. Johannes: Maar ek is mos altyd hier langs jou... Hoekom vra jy?

Bekkie: Want ek kan nie sien nie, doom Johannes.

Ds. Johannes: Nou hoekom is jy dan gebliddoek, Bekkie?

Bekkie: Wel, doom Johannes, want ek wil graag weet hoe dit voel om blind te wees?

Ds. Johannes: En hoe voel dit, Bekkie.

Bekkie: Gladnie lekker nie, Doom Johannes. Dit is baie sleg om niks te kan sien nie. Alles is donker. Dit is soos om in die nag te loop. Ek het sommer al 'n paar keer my kop teen 'n deur of 'n muur gestamp. Ek het sommer al 'n paar keer gestruikel en geval ook. Kyk Oom Johannes, kyk hierdie pleister teen my kop.

Ds. Johannes: Ai tog, Bekkie, maar dit moes baie seer gewees het. Maar weet jy, die Bybel praat ook van mense wat in die donker lewe.

Bekkie: Hoekom is hulle dan blind, ds. Johannes?

Ds. Johannes: Nee, hulle is nie blind nie, Bekkie. Maar hulle lewens is donker. Hulle dink net aan donker dinge, en hulle kies ook om eerder in die donker dinge te doen as in die lig, waar almal hulle sal sien.

Bekkie: Stamp hulle ook hulle koppe, ds. Johannes.

Ds. Johannes: Ja bekkie, hulle stamp hulle koppe, maar nie soos jy jou kop gestamp het nie. Nee, hulle kry teenspoen, want hulle word uitgevang vir dit wat hulle in die donker gedoen het.

Bekkie (leun na doom Johannes toe): Ag, doom Johannes, dis verskriklik! Maar wil doom nie my blinddoek maar liewer afhaal nie... Ek wil nie meer in die donker lewe nie. Ek wil liewers in die lig lewe, daar waar mense kan sien wat ek doen, en waar ek ook Jesus se liggie kan laat skyn!

Ds. Johannes: Gaaf Bekkie, ek doen dit graag (haal Bekkie se blinddoek af)!

 

Boodskap...

 

SKYFIE 1 Daar word vertel dat Van der Merwe ( op 'n slag vir 'n oogarts ingestaan het. Toe die eerste pasiënt by hom kom, kla die persoon dat hy nie ver genoeg kan sien nie. Mike vat hom toe na die venster toe, en vra aan hom of hy die son kan sien. Ja, sê die persoon vir Mike. Nou maar dan kan jy mos ver genoeg sien, sê hy.

Wie van julle kinders kan tot by die son sien? Ja, ek is seker almal van julle kan tot by die son sien. Maar julle kinders het seker ook al gehoor dat 'n mens nooit reguit na die son mag kyk nie. Want, as jy reguit vir die son kyk, sal dit jou oë so seer maak dat jy selfs kan blind word.

Ons mense dink dikwels dat die son maar net daar moet wees... Dat die son maar net in die oggend moet opkom, en in die aand moet ondergaan. Maar eintlik is alles nie so eenvoudig nie... Want in die eerste plek sou julle dalk al geleer het dat dit nie die son is wat opkom nie, maar dat dit die aarde is wat om die son draai, en om sy eie as. En daarom lyk dit vir ons asof die son besig is om te draai, terwyl dit eintlik onsself is.

Toe Galileo Galilei 400 jaar beweer het dat die aarde om die son draai (SKYFIE 2), is hy tot 'n ketter verklaar deur die Roomse Kerk. Hy is uiteindelik eers laat in die 20ste eeu ontban, nadat almal besef het dat hy wel reg was (SKYFIE 3). Partykeer is dit vir die mens moeilik om te besef dat alles nie om onsself draai nie, maar dat daar 'n skeppergod is om wie alles draai.

Die Egiptenare het al in hulle tyd besef dat die son iets baie spesiaals is. En daarom het hulle selfs die son as 'n God gesien, en hulle het gepraat van Ra, die songod. Maar ons weet vandag dat die son self nie 'n god is nie, maar een van baie ander sonne wat ons sien as ons in die nag na die hemel kyk. Uit die Bybel weet ons dat God die hemel en die aarde, die son en die maan en die hele heelal geskep het. Net soos ons liedjie sing weet ons: "My God is so groot, so sterk en so magtig, daar's niks wat my God nie kan doen..."

En omdat God so groot, so sterk en so magtig is, beteken dit juis dat Hy ons geroep om hom te dien. Om sy Naam te prys as die een wat alles gemaak het. En dit is waar ons by ons Skriflesing van vandag kom. Ons weet dat God lig is, en dat daar geen duisternis in Hom is nie 1 (Joh 1:5). Net so was Jesus die lig van God wat na die aarde toe gekom het om die duisternis, die donker en die slegte op die aarde te kom wegjaag... (Joh 1:9).

En dit is die verhaal van Jesus se lewe. Hy het in 'n donker wêreld vir ons donker sondes kom sterf, sodat ons nie meer in die donker hoef te lewe nie. Niemand hou mos in elk geval daarvan om in die donker te lewe nie. In ons huis moet ek altyd 'n ganglig aanlos, sodat Jana en Marnel nie bang word as hulle dalk in die nag wakker word nie.

Net so kan ons nie sonder die lig van Jesus in ons lewe nie. Hy het op hierdie donker aarde kom skyn sodat ons nie in die donker hoef te lewe nie. Maar Jesus moes ook weer weggaan hemel toe om vir ons plek te gaan voorberei. En daarom moedig hy sy dissipels aan om die sy lig te gebruik, en van hom te leer, terwyl hy nog tussen hulle was.

Die Here wil ook vanoggend vir elkeen van julle kom aanmoedig om ook van Sy lig te gebruik, en van Sy lig te leer terwyl julle nog in Bospoort is. Wanneer 'n mens van jou huisgesin en jou familie weggaan, word dit baie maklik donker om jou. Daar is selfs baie familie van ons in die buiteland. Wanneer hulle dan daar ver is, waar iemand nie meer sien wat hulle doen nie, dan leef hulle maklik in die donker. Dan gaan hulle nie meer kerk toe nie, en dien nie meer die Here nie.

Elkeen van julle moet weet dat dit 'n voorreg is om in die lig van God te kan lewe. Dis 'n groot voorreg om Christelike ouers te kan hê, om skool toe te kan gaan, en om kerk toe te gaan, en van die Here te leer. Maar dikwels besef ons dit nie. Dikwels dink ons maar net dat die Here om ons draai, en net daar is om ons te help as ons 'n probleem het nie. Nee, liewe kinders, ons moet altyd onthou dat ons lewe om die Here moet draai, en dat ons Hom altyd moet prys in alles wat ons doen.

Ek sluit af... Ek wonder wie van julle daardie kinderliedjie ken wat so begin...

Eendag sê pa muis vir sy liewe kleine vrou, ek dink dit is nou tyd dat ons dogtertjie moet trou...

Ja, ek kan sommer sien 'n hele paar kinders ken die liedjie! Dit vertel die verhaal van 'n pa en 'n ma wat vir hulle dogter net die beste wou hê. Hulle het toe besluit dat muis nie die beste man vir haar sal wees nie. So besluit hulle om die son te vra om vir haar 'n man te wees (Skyfie 4). Maar die son het gesê dat hy nie beste man sal wees nie, omdat wolk hom sommer donker maak as hy voor hom gaan staan. So gaan vra hulle toe vir wolk om met hulle dogter te trou. Maar wolk het ook geweier omdat hy beweer het dat wind sterker as hy was. As die wind 'n wolk waai, moet hy sommer padgee.

So is hulle toe na wind toe om vir wind te vra om met hulle dogter te trou. Maar wind het ook geweier, omdat hy nie deur 'n muur kan waai, nie. Toe die twee moedelose ouers na muur toe gaan om vir hom te vra, sê hy aan hulle dat hy nie die aanbod kan aanvaar nie, omdat hy niks kan doen as muis 'n gat deur hom vreet nie. En so het die ma en pa maar na muis toe gegaan, en vir hom gevra om met hulle dogter te trou.

Net so moet ons vanoggend ook besef dat ons op baie ander plekke in die lewe vreugde kan gaan soek, eerder as in God se lig. Of dit nou in die blink liggies van die stad is, of die flitsende ligte van 'n nagklub, of die blink glans van diamante – ons moet onthou dat dit vreeslik is as 'n mens uiteindelik in die donker moet lewe. Dit is dikwels maklik om in die lig te loop. Maar as jou hand nie in God se hand is in die donker tye nie, as jy vanoggend net nag voor jou sien, weet dat God daar is. Ons kan nooit vir hom wegvlug nie... (Ps. 139). Hy steek ook vandag sy Hand weer na jou uit, en nooi jou om in sy lig te lewe!

 

AMEN!

Preek te Bospoort op Sondag 18 Maart – 4de Lydenssondag.

Skriflesing: Matt. 21:33-46

Boodskap:

 

Skriflesing en liedere vir Sondag 18 Maart (Vierde Lydensondag).

 

Skriflesing: Matt 21:23-46

Tema: God gee alles vir Sy wingerd!

 

Voorsang:

Hierdie donker uur…

Heer Jesus, my Redder.

Stuur my

As ek soek…

 

Lofsang:

Wat 'n vriend het ons in Jesus (vs 1-3) –

 

Na Wet: Lied 396:1-4

 

Slotsang:

Lied 266 Onse Vader

 

Boodskap.

Daar word vertel dat die bekende Langenhoven eenkeer in die parlement gesê het dat die helfte van die parlement ape was. Die lede van die opposisie of die ander party het toe geprotesteer en gesê dat hy dit moes terugtrek. Langenhoven het toe dadelik geantwoord: "Goed, die helfte van die parlement is nie ape nie."

Net soos Langenhoven in sy tyd met die parlementslede se koppe gesmokkel het, of hulle aspres deurmekaar gemaak het, so het Jesus dikwels mense deur sy gelykenisse 'n bietjie deurmekaar gemaak.

(SKYFIE 3)Sarah Breuer het gesê dat Jesus se gelykenisse nie daar was om dit wat ingewikkeld was eenvoudig te maak nie, maar juis om dit wat mense vir die eenvoudige waarheid of soetkoek aanvaar het, ingewikkeld te maak. Jesus het mense weer opnuut laat dink oor die verkeerde wat hulle gedoen het, wat vir hulle heeltemal reg gelyk het.

Soos Jesus in sy lydenstyd Sy dood nader, sien ons hoe Hy telkens daarna verwys dat Hy oppad is om te sterf. En in die gelykenis van die boere en die wingerd kry ons een van die duidelikste verduidelikings van hoe sleg dit in Israel gegaan het, en hoekom dit nou eintlik nodig was dat Jesus vir die wêreld moes kom sterf.

In Mattheus 21 kom vertel Jesus 'n verhaal wat vir ons meer verduidelik van dit wat alreeds gebeur het, van dit wat in Jesus se tyd besig was om te gebeur, en dit wat in die toekoms sou gebeur.

Jesus kom vertel die verhaal van 'n boer wat 'n wingerd ontwikkel het. Hierdie boer was baie lief vir sy wingerd, en het 'n klomp dinge gedoen om sy wingerd veilig te maak. Hy het 'n wagtoring gebou, sodat niemand sy druiwe sommer kon steel nie. Hy het ook 'n muur om die wingerd gebou, sodat enige mens of dier nie daar kon inkom en dit kom verniel nie. Verder het hy ook gegaan en 'n parskuip om die druiwe tot sap te verwerk. Dit is duidelik dat die boer moeite gedoen het met sy wingerd.

Toe het die boer weggegaan, en die wingerd aan 'n groep boere verhuur. Maar hierdie boere het nie vir die eienaar omgegee nie. Hulle het net aan hulleself gedink. En toe die boer mense stuur om sy deel van die oes te kom opeis, het die verhuurders sy gestuurdes mishandel, en van hulle doodgemaak. Die boer het weer so gemaak, en vir 'n tweede keer het dieselfde gebeur. Die mense het hierdie gestuurdes van die boer doodgemaak...

In hierdie gelykenis moes die Fariseërs in die tyd van Jesus onmiddelik geweet het dat Jesus eintlik oor hulle praat. Want die Romeinse regering het in daardie tyd die Fariseërs juis aangestel om oor die wingerde en lande in Israel toesig te hou. Hulle het egter net hulleself verryk, en die volk arm gemaak. Soos met die tollenaars het hulle omkoopgeld aanvaar, en nooit die volle bedrag aan die Romeine oorbetaal nie.

Maar Jesus se verhaal het nog 'n dieper betekenis as dit gehad... Hy het ook aan Israel gewys hoe dit gebeur het dat Hy Israel as sy wingerd baie liefgehad het. In Jesaja 5:1-7 word Israel al met 'n wingerd vergelyk. Dit is 'n wingerd waarvoor God alles gedoen het, maar 'n wingerd wat nie vrugte gedra het soos dit moes nie.

Keer op keer het God in die geskiedenis mense geroep en na Israel toe gestuur. Hulle is nooit werklik aanvaar nie. Dink maar aan Moses, die profete Elia, Natan, Jesaja, Jeremia en Esegiël. Die mense wou nie hoor wat hierdie gestuurdes van God sê nie, en het hulle telkens vervolg. Ja, koning Herodes het selfs vir Johannes die doper doodgemaak, en sy kop in 'n skottel aan Salome, sy broerskind gegee.

Maar Jesus se storie is nog nie klaar nie. Hy vertel hoe die boer besluit om sy eie seun na die boere toe te stuur. (SKYFIE 5) Hy het gedink dat hulle ten minste na hom sou luister. Maar juis dan doen die boere 'n skokkende ding. Hulle dink... dalk is die eienaar van die wingerd dood. As ons sy seun doodmaak, sal hy nie eers 'n erfgenaam hê nie, en dan sal die wingerd mos vir altyd ons sin wees. Hulle tree toe eintlik op asof die eienaar dood is, asof hy hulle niks kan maak nie, en vermoor sy seun.

Ja, liewe vriende, met Jesus se verhoor was dit skokkend dat die heiden Pilatus sy hande in onskuld gewas het, en gesê het dat hy liewers niks met Jesus se dood te doen wou hê nie. Dat die Jode uitgeroep het – "Laat sy bloed op ons kom!". Hulle het in 'n sin kom sê dat Jesus se bloed eerder op hulle moes kom, dat hulle bereid was om God se oordeel oor hulle lewens te aanvaar. Hulle het eintlik gemaak asof God dood was. Of hulle het gedink... Ons sal wel later bekommerd wees oor wat met ons kan gebeur...

En wat doen God... God vernietig die leiers van die Joodse volk. In 70 na Christus word Jerusalem deur die Romeinse keiser Vespasianus ingeval, en die stad Jerusalem word vernietig. Jesus, die seun van die eienaar, staan op uit die dood, kom stel 12 apostels aan, wat werklik vir sy wingerd sou omgee, en die goeie nuus van sy oorwinning oor die dood die wêreld sou inneem.

En so kom ons by die toekoms van hierdie verhaal, waarin ons vandag leef. Telkens in die geskiedenis moes die Here maar weer ingryp in sy wingerd... In die 16de eeu het die Rooms katolieke priesters hulleself verryk ten koste van die volk. Martin Luther, Johannes Calvijn en Ulrich Zwingli moes 'n bittere stryd stry om die bande van hierdie leiers te breek. Baie mense het gesterf...

Jesus was God se laaste poging... Dit was sy laaste probeerslag. Hy het niks groter om te gee as sy eie Seun nie. Wat maak jy met Jesus in jou lewe? Aanvaar jy hom as God se Seun, sy gestuurde, of gaan jy maar eers op jou manier met jou wingerd aan... Die tyd is min... Een van die dae is die koning van die wingerd finaal terug, en dan sal elkeen moet vertel wat hy of sy met God se seun gemaak het. (SKYFIE 7).

Ja, liewe vriende, ons is die verhuurders van 2012... Ook ons is aangestel om na God se wingerd om te sien, en seker te maak dat dit vrug dra. Ons word geroep om die vrugte van die wingerd ook aan God terug te gee... Hierdie wingerd is vir God so belangrik dat sy seun Jesus daarvoor kom sterf het. Gee ons regtig om vir die wingerd, en kyk ons daarna? Kan ons die vrugte van die wingerd wys? Gee ons aan God sy regmatige deel van die oes? Gee ons die oes van die wingerd op die regte tyd aan God, of hou ons dit eenkant, met die voorneme om dit later eers te gee?

Hierdie vraag moet elkeen van ons maar op ons eie antwoord. Al wat ons wel deeglik moet besef, is dat die Groot Boer baie lief is vir sy wingerd. Ons word geroep om sy wingerd op te pas, en ook soos die gestuurdes van destyds, te protesteer teen elkeen wat hierdie wingerd vir sy eie gewin gebruik, sonder om aan God te gee wat Hom toekom...

AMEN!

 

Boodskap op Sondag 26 Februarie 2012 (Eerste Sondag in Lydenstyd).

 

Skriflesing: Matt 10:34-39

Tema: Neem jou kruis op en volg Jesus!

 

Voorsang:

Kyk Hy kom!

Houtkruis

Meer en meer soos Jesus

Herder Heer

Lofsang:

Lied 464 O Heer my God!

 

Na Wet:

Liedboek 177: Jesus, groot bo almal

 

Slotsang:

Lied 512:1-3 Nader my God by U…

 

Boodskap:

 

Daar word vertel van die ou wat 'n advertensie in die koerant geplaas het vir iemand om saam met hom te gaan jag. Die persoon moet lekker kan gesels, goeie grappe ken, en goed kon kosmaak. Nie lank na die advertensie nie, bel daar iemand wat hakkel. Toe die persoon hom vra of hy goeie grappe, ken, antwoord hy – Nnnie e-e-e-intlik nnnniee. Die jagter vra hom toe of hy goeie kos kan maak, en hy antwoord – Nnnneee, e-e-ek vvvverbrand aaaaltyd die kkkkos wwwwanneer ek mmmoet kkkkosmaak. Nou hoekom bel jy dan, vra die jagter toe... Wel, ek bel net om te sê dat ek nie kan saamgaan nie...

Weet julle, liewe vriende, ek het al baie sulke oproepe in my lewe as predikant gekry... Baie oproepe van mense wat baie belangstel om iets te gaan doen. Mense wat sê dat iets lekker klink, maar wanneer die kostes en die aktiwiteite op die program genoem word, besluit dat hulle liewer 'n volgende keer sal saamgaan. Mense, veral kinders, sal ook dikwels vra wie die ander is wat saamgaan, en dan eerder besluit om te bly, as daar nie van hulle maatjies is nie.

Alhoewel Jesus dit nooit maklik gehad het in sy bediening op aarde nie, het hy op 'n stadium 'n baie groot aanhang gehad. Daar was 'n menigte mense wat saam met hom geloop het, en gretig was om te hoor wat hy sê. Mense wat graag die wonderwerke wou sien wat hy doen... Ek het laas Sondag ook daarna verwys dat Jesus Moses en Elia op 'n berg ontmoet het, en dat hulle hom aangespoor het om hierdie pad klaar te stap. Petrus wou nog drie hutte vir hulle bou, maar Jesus het hom bestraf, omdat Hy geweet het dat daar 'n moeiliker pad vir Hom voorlê.

Maar hier, in ons Skrifgedeelte van vanoggend, kom Jesus by 'n punt waar hy sy volgelinge moes sif... Hy moes besluit wie verder saamgaan en wie nie. Hy het geweet dat die pad van swaar lyding nou voorlê, en dat nie almal hierdie deel van die pad sal kan saamstap nie. En daarom kom praat Hy baie duidelik met sy dissipels oor die toelatingsvereistes vir hierdie pad saam met Hom.

In sy bekende boek, "the cost of Discipleship" kom leer Dietrich Bonhoeffer ons die volgende: "The first call which every Christian experiences is the call to abandon the attachments of this world." Bonhoeffer kom leer ons hier dat die eerste ding wat die Here Jesus vir sy dissipels gevra het, was om hom onvoorwaardelik te volg... Hulle moes dit wat hulle in hierdie wêreld vasgehou het, laat staan, en Hom alleen volg.

En daarom begin die Here Jesus op hierdie pad van swaarkry om te verwys na die dissipels se familie. In die eerste plek kom sê Jesus aan hulle dat dit nie soseer gaan oor wie saamgaan op die pad nie, maar oor wie nie saamgaan nie. Om die pad saam met Jesus te stap, beteken in die eerste plek dat 'n mens vrede daarmee sal maak dat jy nie almal wat vir jou lief en dierbaar hier op aarde is, sal kan saamneem nie. 'n Paar van julle het al die film "Left Behind" gesien. Al is die film volgens my op die dwaalleer van die wegraping gebou, is dit belangrik om raak te sien dat van ons familie, en gesinslede gaan agterbly as die Here Jesus weer kom om ons te kom haal. Ons sal moet besluit vir wie ons liewer is...

Die meeste van ons hou daarvan om die "vrede te bewaar". Rick Warren noem in sy kursus oor doelgerigte liefde dat die "bewaar van die vrede" nie beteken om maar net oor elke probleem met ander stil te bly nie. Nee, dit gaan daaroor om probleme met ander te hanteer, daaroor te praat, en dit te probeer uitsorteer. Dit gaan ook beteken dat ons uit party situasies en verhoudinge in ons lewe moet uitstap, wanneer dit duidelik word dat mense nie om ons teen Jesus kies. Dit was veral in Jesus se tyd waar wanneer Jode Christene vervolg het, en gesinslede wat Jesus aangeneem het, heeltemal verwerp is. Dis hoekom Paulus ook sê dat 'n gelowige nie met 'n ongelowige in dieselfde juk kan trek nie. Ons kan nie nou met iemand saamleef, as so 'n persoon die Here Jesus verwerp nie.

Die tweede kwalifikasie wat Jesus vir sy mede-reisigers stel, is dat hulle bereid moet wees om hulle kruis op te neem en Hom te volg. Wat het dit in Israel beteken wanneer jy by soldate verbyloop met iemand wat besig is om 'n kruis te dra. Hulle was verseker nie oppad na 'n partytjie nie. Nee, hierdie ou wat die kruis gedra het, was oppad om te gaan sterf.

As ek vandag vir jou vra of jy 'n kruis dra, sou jy dalk in die eerste plek dink aan mooi goue of silwer kruisie aan 'n hangertjie om jou nek of aan jou pols. Of 'n kruis op jou T-hemp of op jou kar. Maar eintlik beteken dit iets totaal anders. Om jou kruis in die lewe te dra, beteken dat jy saam met Jesus oppad is na Golgota – dat jy bereid is om saam met Hom te sterf. Ons sing so maklik die lied "Nader my God by U", met die tweede reël wat lui: "Al is daar ook 'n kruis, nodig vir my". Is jy so ernstig oor jou verhouding met die Here Jesus dat jy elke dag jou kruis sal dra? Dat jy elke dag ook die pad sal stap waarin jy duidelik sal wys dat jy bereid is om vir Hom te sterf?

Met Jesus se derde vereiste vir 'n dissipel kom draai Hy geen doekies om nie. Hy kom spel baie duidelik uit wat ware dissipelskap beteken. Jesus kom sê baie duidelik aan sy dissipels: "As jy my wil volg, moet jy bereid wees om te sterf...". En dit is nie net een keer dat Hy dit sê nie. Telkens in die Nuwe Testament kom herhinner die Here Jesus ons daaraan. In Markus 10 moet die ryk jongman aan sy liefde vir besittings sterf, en alles verkoop en vir die armes gee. In Johannes 12:24 staan daar dat ons soos 'n koringkorrel in die grond moet val en sterf, as ons werklik vrug wil dra. En so kan ons voortgaan.

Hoe lief het Jesus jou??? Daar word vertel van iemand wat tot Jesus gebid het, en telkens aan Jesus gevra het dat Jesus aan hom moes openbaar hoe lief Hy vir hom is. Jesus het sy hande na die kante toe uitgesteek met die merke van die spykers duidelik sigbaar aan Sy hande, en aan hom gesê: "So lief!". Maar die vraag word ook vanoggend aan elkeen wat hier sit, gevra: "Hoe lief het jy vir Jesus?". Is jy bereid om aan jou self te sterf? Is jy vir hom so lief dat jy jou lewe vir Hom sal gee.

Die tyd in ons land en in Suider Afrika waar ons werklik bereid sal moet wees om vir Jesus en vir sy boodskap te sterf, is dalk baie nader as wat ons besef. Maar terwyl daar dalk nog nie vanoggend 'n terroris hier gaan instorm en 'n geweer teen jou kop gaan druk met die woorde: "Verwerp Jesus of ek skiet jou nie!", is die vraag nog steeds of ons Jesus in ons lewe bo alles stel.

Is Jesus vir ons belangriker as enige van ons vriendskappe hier op aarde. Is Jesus vir my belangriker as my liefdesverhouding met my ou of meisie? Is Jesus vir my belangriker as enige saketransaksie of belegging wat ek in die lewe het? Ek nooi jou vanoggend om opnuut weer hierdie verbindtenis te maak, en werklik vir Jesus te kom volg. Om werklik die pad vorentoe saam met Hom te kom stap.

Ek sluit af. Die boere daar in die Oos-Kaap het 'n slim plan gekry vir bobejane wat 'n probleem in die lande geskep het. Wanneer hulle probleme met die bobejane onder hulle gesaaides gekry het, het hulle dikwels gegaan en een bobbejaan gevang. Hulle het dan die bobbejaan wit geverf, en hom weer tussen die ander gelos. Julle kan dink wat gebeur het. Wanneer hierdie wit bobbejaan na die trop terugkeer, het hulle van hom af weggehardloop, en wou niks van hom weet nie. Dit het die bobbejane so deurmekaar gemaak, dat die boere vir 'n geruime tyd nie las van die bobbejane gehad het nie.

In 'n sin is ons samelewing ook maar soos hierdie bobbejaangemeenskappie... Ons word groot met die boodskap van die Bybel, maar ons kweek maar ons eie gewoontes, gelowe en oortuigings saam met die tyd. Ons kinders word van kleins af groot in die kategese, lê belydenis van geloof af, en kry dan weer kinders, wat hulle doop en grootmaak, en so gaan die rustige kringloop aan. Maar deur die verloop van tyd raak ons aan so baie verkeerde dinge gewoond, dat ons nie besef wat dissipelskap werklik van ons vra nie. Ek is seker dat Jesus in 2012 ook ook waarskynlik soos 'n wit bobbejaan tussen 'n klomp ander bobbejane sou gelyk het. Hy sou net so anders opgetree het, dat mense niks met hom te doen sou wou hê nie, en hom waarskynlik uiteindelik ook sou kruisig, of uit ons samelewing sou uitwerp.

Ek het vanoggend vir julle nuus... As jy 'n ware volgeling van Jesus wil wees, gaan jy nie maar net lekker en gemaklik in jou omgewing inpas nie. As jy nie deel is van die skinderpraatjies, of ingestel is om met die belangrike mense se leefstyl vol te hou nie, gaan jy maar redelik op jou eie leef. As jy weier om deel te wees van korrupsie en bedrog, en die reguit pad wil stap, gaan jy min vriende hê. As jy jou ontferm oor hulle wat werklik nood het, wat werklik 'n dokter nodig het, en jou met hulle vereenselwig, gaan mense jou begin vermy...

Dietrich Bonhoeffer het ook in 'n preek oor 2 Korinthiërs 12:9 gesê: "Christendom adjusts itself far too easily to the worship of power. Christians should give more offence, shock the world far more, that they are doing now. Christians should take a stronger stand in favour of the weak than considering first the right of the strong". Of in Afrikaans vertaal: "Christene skakel te maklik by die aanbidding van mag in... Christene moet baie meer aanstoot gee, hulle moet die wêreld baie meer skok, as wat hulle tans doen. Hulle moet 'n baie sterker standpunt vir die swakkes inneem, eerder as om die

 

… to be for justice is not only the right thing to do, but a joyful thing to do. It is freeing. It is good news."